Breadcrumb

Na Boneiru, Sint Eustatius i Saba

Método pa establesé tarifanan pa produkshon i distribushon di koriente i awa di bebe na Hulanda Karibense 2017 - 2019

Den e método aki ACM ta establesé kon e ta determiná e tarifanan pa awa di bebe i koriente na Boneiru, Sint Eustatius i Saba. ACM tin e tarea aki a base di e lei di koriente i awa di bebe BES, ku a drenta na vigor riba 1 di yüli 2016.

E método aki ta bálido pa e temporada di 1 di yanüari 2017 te ku 31 di desèmber di 2019. Nos ta yama esaki e promé término di regulashon. ACM ta usa e método aki  pa establesé tarifa tantu pa produktornan komo pa distribuidónan di koriente i awa di bebe. Ta trata di e siguiente kompanianan:

  • Kompania di awa i energia Bonaire N.V. (WEB)
  • ContourGlobal Bonaire B.V. (ContourGlobal)
  • Statia Utility Company N.V. (STUCO)
  • Saba Electric Company N.V. (SEC)

Kon a establesé e método aki?

ACM den kuminsamentu di aña di 2016 promé a kompilá un Dokumento di Komienso ku un splikashon di e regulashon di tarifa na Hulanda Karibense. Den esaki ACM ta splika riba ki manera ACM ke ekipá e regulashon di tarifa. Despues na yüli di 2016 ACM a skibi i konsultá un konsepto di método. Interesadonan, manera kompanianan di utilidat públiko i organisashonnan di kliente, por a reakshoná riba e konsepto di método aki. A base di e reakshonnan aki ACM a establesé e método definitivo riba 12 di sèptèmber 2016. ACM a publiká tur reakshon riba su website i den e método definitivo ACM ta splika kon el a prosesá e reakshonnan.

Kuadro hurídiko

E método ku ACM mester establesé a base di e lei menshoná, ta forma e kuadro ku ta usa den e dekretonan di tarifa. No ta posibel pa un interesado oponé òf apelá e método aki. Por oponé òf apelá e dekretonan di tarifa si. I den un prosedura hurídiko kontra e dekretonan di tarifa un interesado por trese argumento tambe kontra di e método.

Kuadro di regulashon

E ophetivo di e Lei koriente i awa di bebe BES ta un suministrashon konfiabel, pagabel i duradero di koriente i awa di bebe na Hulanda Karibense. E regulashon di tarifa mester pèrkurá pa stimulá kompanianan pa traha efisientemente, pero tambe pa kompanianan por realisá nan invershonnan. ACM a skohe pa e método ku e nòmber profit-sharing. E método aki ta enserá ku ACM ta kalkulá di antemano kiko e gastunan lo bira pa e kompania. Si despues resultá ku ekompania su gastunan tabata mas haltu òf mas abou, mitar ta bai pa kuenta propio òf na benefisio di e kompania, i e otro mitar pa kuenta òf benefisio di e konsumidó.

Esaki ta pone ku un kompania lo trata di ekonomisá riba gastunan pa asina e kompania sobra mas sèn. Por usa e sèn aki pa proyektonan, òf por ehèmpel por pag’é komo dividènt na e akshonista (e Kuerpo Públiko)

Si un kompania logra di spar sèn, pa e siguiente aña ACM ta stipulá e entradanan mas abou i asina e tarifanan tambe ta baha. Di e manera aki e konsumidó tambe ta probechá di e ekonomisashon di gastu ku e kompania ta realisá.

Método di regulashon

E método di profit-sharing ta konsistí di kuater paso:

  1. Stipulashon di e gastunan. ACM ta konektá ku e gastunan real di e kompania. ACM por hasi adaptashon ainda, por ehèmpel den kaso ku  no tur gastu ku e kompania tin ta nesesario pa e tareanan legal di e kompania. E gastunan ta gastu operashonal i gastu di kapital. Gastunan di kapital ta amortisashonnan i un rendimentu rasonabel ku un kompania por haña. E gastunan total di e kompania ta partí den gastu pa awa di bebe i gastu pa koriente i pa produkshon i suministrashon di ámbos previshon.
  2. Di gastu pa entrada. ACM ta adaptá e gastunan real di un aña anterior  na e inflashon i na por ehèmpel invershon antisipá. Asina ta yega na e entradanan pa e kompania pa e próksimo aña.
  3. Di entrada pa tarifa. Despues mester konvertí e entradanan aki pa tarifa. Lei ta stipulá kua kategoria di tarifa tin (tantu pa awa di bebe komo pa koriente):
  • e tarifa fiho di uso pa kubri e gastunan di e ret, inkluso e midimentu i e prevenshon i solushon di fayo tékniko;
  • e tarifa variabel di uso pa kubri e preis di produkshon ku e distribuidor ta paga e produktor;
  • e tarifa di konekshon pa kubri e gastunan pa konektá ku e ret;
  • e kompensashon pa rekonekshon pa kubri e gastunan pa rekonektá un kliente ku a deskonektá anteriormente;
  • e tarifa pa transportashon riba kaya di awa di bebe ku ta distribuí ku trùk, pa kubri e gastunan di e transpòrt di awa di bebe ku trùk.

Pa tur e kategorianan di tarifa aki ACM ta kalkulá e tarifa partiendo e entradanan di paso 2 den e kategorianan aki, i dividí nan pa e kantidat di kliente pa kategoria.

Kalkulá diferensha despues. Ora un aña kalendario pasa por wak si e entradanan manera ACM a stipulá tabata igual na e gastunan real di e kompania. Si e gastunan tabata mas haltu òf mas abou, 50% ta pa kuenta propio di e kompania. E otro mitar, ACM ta kobra òf kompensá den e entradanan (i tarifanan) di e aña siguiente.

ACM a laga hasi investigashon pa establesé kiko ta un rendimentu rasonabel pa kompanianan di utilidat públiko. Ta yama e rendimentu rasonabel aki: Weighted Average Cost of Capital (WACC).

E gastunan di kombustibel pa e produkshon di koriente por varia, pasobra e gastunan ei ta dependé di e preis di zeta. E produktor por adaptá esaki mensualmente den e preis di produkshon. Pa e promé término di regulashon, ACM ta kalkulá a base di e gastunan real ku e produktor ta paga pa e kombustibel. Pa e próksimo término di regulashon, ACM ke investigá pa kompra di e kombustibel aki tambe si por duna un insentivo pa hasi e kompra ei mas efisiente posibel.

Basá riba lei, e distribuidor por adaptá e tarifa di uso variabel maksimalmente dos biaha pa aña komo konsekuensha di adaptashonnan den e preis di produkshon, esta riba 1 di yüli i 1 di yanüari.

Reakshonnan di interesadonan

ContourGlobal, WEB, STUCO, SEC, Unkobon, Bonhata i Bonaire Hospitality Group a reakshoná riba e konsepto di método i/òf e konsepto di método WACC. A base di e reakshonnan aki ACM a hasi algun adaptashon. E adaptashon di mas grandi ta pa hasi posibel ku ta pèrmití pa adaptá e preis di produkshon tur luna komo konsekuensha di un kambio den gastunan di kombustibel.

Tambe ACM a splika pa kada punto di bista kiko e punto di bista aki a trese, i ACM a aklará partinan di e método mas aleu.